Өткен тамыз айында Түркия шетелдіктердің жылжымайтын мүлік сатып алуы үшін өзара принципті жою туралы заң қабылдады. Содан бері Қазақстан азаматтары Түркия Республикасында 57 жылжымайтын мүлік сатып алған, деп хабарлайды BNews.kz тілшісі.
Эгей жағалауындағы жылжымайтын мүлікті ең белсенді сатып алушылар – Алматы, Шымкент және Астана тұрғындары. Бұл негізінен Түркияда жылжымайтын мүлік сатып алуды инвестиция ретінде немесе балалары мен ата-аналарына баспана сатып алуды қарастыратын бизнесмендер.
Бұл туралы Алматыда өткен баспасөз мәслихатында Қазақстандағы Sinan Invest инвестициялық құрылыс холдингінің менеджері Александра Соколова мәлімдеді.
Соколованың айтуынша, 2012 жылы 183 елден келген инвесторлар жалпы ауданы 1 162 мың шаршы метр болатын 2 578 түрік жылжымайтын мүліктерін сатып алған.
Түркиядағы жылжымайтын мүліктің басым бөлігін неміс азаматтары сатып алған. 561 немістің меншігінде жалпы ауданы 789 мың шаршы метр 775 түрік жылжымайтын мүлік бар. Үздік үштікке ағылшындар мен ресейліктер де енген. Ресей Федерациясының азаматтарына 2008 жылдан бастап жеке тұлғаға жылжымайтын мүлік сатып алуға рұқсат етілген. Түркиядағы Ресей азаматтарының 416, ал Ұлыбритания азаматтарының 365 жылжымайтын мүліктері бар, ресейліктер мен британдықтарға тиесілі жылжымайтын мүліктің жалпы ауданы 118 мың шаршы метрді құрайды. 2012 жылы Қазақстан азаматтары 57 жылжымайтын мүлік сатып алды, Түркия шетелдік инвесторлар арасында қазақстандықтардың үлесі артады деп болжап отыр. Бұрын хабарланғандай, түрік бизнесі, керісінше, Қазақстандағы фармацевтикалық зауыттардың құрылысына инвестиция салуды көздеген.
Ыстамбұлда өткен бизнес-форумда құрылыс және құрылыс материалдарын өндіру, өңдеу өнеркәсібі салаларына инвестицияны дамыту, Қазақстанда каустикалық сода шығаратын зауыт салу мәселесі қаралды. Ал өткен жылы Қазақстан мен Түркия «Жаңа синергия» бірлескен экономикалық бағдарламасын жүзеге асыру бойынша іс-шаралар жоспарын қабылдады, онда сауда-экономикалық қарым-қатынастар деңгейін 10 миллиард еуроға дейін арттыру және инвестиция көлемін жыл сайын 500 миллион еуроға арттыру көзделеді.
Авторы: ӘЛИМА БОЛАТБЕК
